AEROMODELLING HI ENGE ANIH? - Science and Technology Group

Thuhmahruai

Aeromodelling tih hian thlawhtheihna a khalhtu awm lo emaw thlawhtheihna emaw lem tihna a ni. Model aircraft hi chi hnih in a inthen hrang a, chungte chu Thlawkthei lo (Non-Flying) leh Thlawkthei (flying). Non-flying model hi static,display leh shelf models tih ani tlangpui a. Flying models ve thung hi chu toy gliders card stock , foam polystyrene a siam te an ni tlangpui .

            Non-flying models hi a tlangpuia an siam nasat (mass produced) ang chi hi a ni a , a hmanrua hi a tlangpui in thir emaw plastic emaw a siam ani. Static models thenkhat te chu Museum-ah te show piece a tan an siam thin ani. Aircraft company te pawn static model hi an hmang tangkai hle a , thawlhtheina lem (engineering sample) a tan  an lo siam thin bawk ani.

Flying models hi chu a thlawk thei tura siam anih avangin, a tak a an kher a ngai lo , aerodynamics hi an ngai pawimawh zawk tlangpui  a, amaherawhchu atak ang chiah model pawh an siam nual tho ani. Flying models hi aero sports (Rc models) ah te hian an hmang nasa em em a, Sports chi khatah chhiar theih alo ni ve tawh ani.

Mizo ten kan kalpui dan tlangpui

Mizo te hian Aeromodelling hi kan hmelhriat tam lutuk awm love, a hmasa in tunlaia kan Music video leh Film vela kan hman lar em em Drone kan tih mai hi kan hriat tlanglawn ber chu ani mai a. Anihna takah chuan Drone tia kan hriat lar hi Multicopter niin chungte chu  tricopter, Quadkopter, Hexacopter leh octocopter ani, Gps leh sensor hrang hrang neiin a hmang tute tana awlsam tur ang bera thuam  a ni. Drone hi Kum 2016-17 chho vel khan mizo te hian kan hre lar tanna  tunah chuan lar tawh tak ani. Drone hi ramchangkang zawk te chuan Sport-ah rin lut in, in tihsiakna hrang hrang an nei thin ani. Amaherawhchu Sport atana an hman hi chu Gps pawh hmang lo a khalh pawh har tak Fpv Goggles hmanga khalh thin ani. Gps leh camera hmangho hi chu Commercial leh Production hrang hrang atan an hmang ber zawk.

Awle, tunah chuan Aeromodelling lam hrut leh ta ila, Aeromodelling chu enge kan tih chuan Radio hmanga thlawhna (Plane) model hrang hrang siam chawp kan control theih hi ani. Kan hriattheih chin ah kum 1986 vel khan Zonunsanga Chawngthu, thakthing veng chuan Diesel CoX engine leiin bul a tan chho a, hun a kal zel hetiang lama tui te chu in hre pawh ta zela. Kum 2008 khan hetiang lama tui, thian ho tlem te chuan pawl  din in Mizoram Aeromodelling Club (MAC) chu a rawn piang a, a hnu deuh-ah Mizoram Aeromodellers Association (MAA) in a hming an thlak a, tunthleng in he pawl hi nung takin a la kal ve reng a member pawh an awm ve nual tawh ani. MAA hi hobbyist rual tih takah sumdawnna atana hmang lovin thlawhna model hrang hrang te siam in an khalh thin a, show hrang hrang te neiin  model hrang hrang engine tak tak hmang leh electric motor hmang te an siam thin ani..

Aeromodelling hi technical thil lutuk anih avang leh khalh zir ve ngai anih vang hian Drone alar ang em em hi chuan a lar thei lo ani. Drone kan tih tak hi chu Aeromodelling huang-ah chuan an rin lut lem lo a, amaherawhchu RC (Radio Control) hobby-ah erawh chuan hmun pawimawh tak a chang ve thung si ani. Ram dang nena tehkhin chuan kan la nau hle a mahse kan thlen chinah chuan hmasawn chak tak kan ni thung. RC hobby hi naupang toy nen kan hriat pawlh leh tlat thin erawh a pawi hle, kan sawi tawh ang khan naupang toy mai a ni loh zia chu kan hre awm e. Sorkar dept hrang hrang pawh hian survey neih nan leh a tula hman turin Drone hi dept in an kawl ve fur tawh bawk a ni.

State danga an kal pui dan tlangpui

India ram chhungah RC Community hi state hrang hrang-ah a lo awm nual tawh a, chungte chu Delhi, Pune, Mumbai, Chennai, Lucknow, Banglaore, Hyderabad, Ahmedabad leh Coimbatore ah te a ni a. Heng state hrang hrang hian RC India webpage (www.rcindia.org) ah hian an tuina te sawi ho in an mamawh tur te leh tanpui an ngaihna ah hemi page hmang hian an in kai hruai thin a. Chu mai bakah, RC Bazar te, RC Equipments leh RC Models ah te hian an mamawh leh an lei duh zawng te an en thei a, Instruction leh hman dan turte an in hrilh thei bawk a ni.

He webpage-ah hian state hrang hrang a Aero-modelling tui mi te tan an thlawh theihna hmun remchang te a inziak thin a. Events awm apiangin he webpage atangin hian information a dawn theih a. Heng events buatsaih-ah te hian  competition hrang hrang awmin, pawisa fai cheng 50,000 atang a 1.4 lakhs te an dawng ve thin a ni.

RC India hian India State hmun hrang hrangah, club awmnate, Stores awmnate, RC Bazaar awm na te a kawh hmuh thei bawk a ni. RC India webpage-ah hian, alo ti tir te tan inkaihhruaina leh an mamawh tur angte an in hrilh thin bawk. He webpage hi Aero-modeling tui mi tan chuan chakkhai lama lun ber leh remchang ber pawl ani hial awm e.

A tawp berah chuan Aeromodelling hi kan theihna leh hriatna ti zau tu tha ve tak mai,hun khawhral nana thil inchhirawm loh tak thil ani. Tun aia nasa zawk hian Mizo te pawh hian tan la ila he RC community hi lo thang lian sela a duhawm hle ani.

 (Science and Technology Group: MJMC 3rd sem 2018, Christopher Lalnunkima, Malsawmkima, Sarah Malsawmtluangi)

 REFERENCE

https://en.m.wikipedia.org accesed on 19:15pm, 7^th September, Saturday.

www.rcindia.org accesed on 14:45 pm, 7^th September, Saturday.