Mizo Christian Te Leh New Media

- Zothansanga Hauhnar

Tunlai khawvel lo changkang zelah, ram hrang hrang te hian ralthuam tha ber ber leh changkang ber ber an siamchhuak chho zel a, mahni ram venhim nan leh a tul hun a ral beihna atan theih tawp chhuahin tan an la chho mek zel a ni. Kei ni Mizoram Christian 100% in ti ram hian engtiang in nge kan Christian na ah hian hma kan lak chhoh ve le .

Tumkhat chu ka pu hi sapel in  ram a vak a, khua a la thim tak tak  hma chuan thingkung ah lawn in hmanlai silai a mu sawh chawp ngai (Tukuli) ngei mai kha hmangin sa lo chhuah hun chu a lo chang ran a, tun hma te kha chuan tunlai hun ang hian sa han rawp deuh a bazaar ah lei mai tur a awm ve lova, kha vang khan sa kap thei te khan ngaihsan an hlawh thin reng a ni . Chutia sa kap tur a tan hmun te an siam fel zawh chuan ka pu chu thingkung ah chuan sa a hmuh pawh a che vat thei tur in a lo om ran tawh a zan a lo thim chho  a, sa kah mai tur an om si lo, in lama haw mai a duh ta a,  thingkung atanga chhuk a tum lai chuan  a piah lawk thimtham hnim phenah chuan  thil engemaw ri hret hret hi a hria a,mahse eng sa nge a hrethei si lova, silai zen tam tawk leh a mu tam tawk chu a sawh ta sauh sauh a, thawm awmna lam a silaimu a han phuh phei mai chu, silai zen a thun hnem deuh nge ni thingkung atrang chuan a silai nghawr let vang chuan a tla thla tawp nghe nghe a, a khingkhang ruh a sawh tliak phah nghe nghe , reilo te leiah chuan a han awm hahdam te te a, a sa kah lam chu en ta lem chuan thei leh theilo chuan in lamah a ho ta a.

A tuk khua a lo var a, a sakah pawh chu a taksa a la nat deuh avang chuan en thei lo chuan  a mu zawi reng mai a, a tuk leh ah chuan a dam ve deuh tawh avangin a sakah na lam chu a va kal leh ngat a, a hmun a va thlen phei chuan, thawm a hriatna lai ngei mai ah khan sanghal lian tak pa 2 hi an lo let reng mai a, a van lawm chiang kher em, thisen a lo far deuh nuai avang chuan  a han chhui chiang deuh a apiah lawk ah chuan sanghal tho pathum an lo let leh reng mai a, ava han lawm lehzual em, sanghal rual tla lai a silai in a lo phuh chu niin, a taksa ah na a nei tih lam reng reng a ngaihtuah tawh lo khua ah a ho leh vat a, a thian thate leh chhungte a han pun a tichuan hlawhtling tak chuan an ho chho leh ta a, a tuk tuk leh vel a ramkal ho chuan a piah lawk ah a dang thi an la hmuh belh zui a ni awm e.

Tunlai kan Mizoram kohhran dinhmun han en hian, rawngbawl duh tam tak rawngbawl dan tur hre si lo, ramthim vei ve deuh bawk si, kal peih bawk si lo, rawngbawl ve duh si rawngbawl dan tur hre si lo leh engmah ti ve thei lo anga inngai, awm awl ta vel mai mai kan tam hle mai.

 Kan hmel leh mizia a inang lo ang bawkin  talent kan neih dan a in ang lova, tumah in phut vak vak thei kan ni bawk hek lo, keimahni zawn ah theuh hian rawngbawlna tur a awm vek tih hi  hriat a tha khawp mai. Kan Lal Isua ngei khan van a a lawn hma lawkin a zirtirte hnenah khawvel zawng zawng ah kal a, chanchintha puang darh turin thu a pe a nih kha, keini kutah pawh he rawngbawlna hi pek a ni tih hi I hre theuh ang u.

Khawvel zawng zawng ah Pathian thu kan puang darh thei dawn mi? tih hi  kan rilru ah zawhna a awm thei awm e, keimah bik ah chuan ka chhanna chu “aw kan puang thei tawh”  tih hi ka chhanna a ni ve ta tlat mai. Engtiangin mo kan puang darh ang ? tih zawhna chu Gospel silaimu ropui Media / New Media hian a chhan sak thei ang che.

Enge Media /New Media chu nita le? Kan hriatthiam theih dan tur chuan heng  inbiakpawhna leh engkim kan in hriatpawhna  atan a tunlai thiamna hman  hi a ni a. Mass media emaw Mass Communication te pawh ti ila a dik vek awm e. Media ah chuan heng Radio, Television, Newspaper, Computer , Internet, Multimedia, te hi kan hre vek awm e. Heng tunlai thiamna hmang hian khawvel hmun hrang hrangah kan hriat miah loh lai hian Pathian rawngbawl in mi tam takin hma an la chho nasa tawh hle.

Engtinnge heng media hmang hian rawng kan bawl ve tak ang le ?

Radio – Tunhnai mai khan Mizoramah pawh Radio hmang hian rawngbawlna nasa lehzualin kalpui a ni a, kan Aizawl khawpui ah hi chuan tumah  radio ngaithla peih vak hi an awm tawh lo ang,  amaherawhchu thingtlang kilkhawr leh ramriak mite tan chuan Pathian thu leh hla an ngaihthlak theihna awmchhun a ni, ram hnathawk mai bakah hian ramri a sipai duty te pawn Radio hmanga rawngbawlna hi an lo hlawkpui hle a, tin hel ho zingah pawn ngaithla an awm thin tih leh program tha an tih zia an mahni ngei sawi atang te pawn a hriat theih.

 Radio hi a man a tlawm a, a ngaithlatu an tam a, ramhla tak tak a awm tlawh mai mai theih loh te pawn an lo ngaithla thei a a pawimawh hle a ni, Radio rawngbawlna atan hian zaithiam te pawn rawng kan bawl thei a, thusawi thiam ten rawng kan bawl thei a, thawnthu sawi thiam te, mithiamte pawn radio rawngbawlna hmang hian tihtheih kan nei reng a nih chu. Helai Radio Station a I aw record khan rin phak bak a zau ah rawng i bawl thei tihna nih chu, tunah hian sermon te pawh mizo tawng mai nilo Meitei, Kokbrok  leh Khasi tawng te pawn  record zel a ni a. Mizoram mai ni lo in India ramah ringawt pawh hian heng kan program tha tak tak te hi ngaithlatu an tam hle a ni. Radio hmang pawn rawng a bawl teuh theih tihna nih chu. Tun ah hian Mizoram a Kohhran hrang hrang a rawngbawltu te hian Radio kaltlang hian hma nasa tak in an la chho zel a ni.

Television – TV hi chu sawi tam a ngai vak om lo ve, LPS leh ZONET hmangin Pathian hla mawi tak tak, Pathian thu tha tak tak  leh Programme tha tak tak midangte tan  rawngbawlna chak takin kan nei thei a ni. Kan Kohhran theuh te  hian program tha tak han duang in han pe chhuak ve thei ila a van hlu dawn em. Mitam tak tan beiseina, harhtharna leh siamthatna kan pe ve thei reng a lo nih chu. Tan lakna tur a van tam tehreng em. Tunah hian zau zawk leh changtlung zawk a hmalak tum mek zel a ni a, Kan talent te kan chet chhuah pui ve dawn lawm mi?

Newspaper -  Thuziak thiam te tan chuan rawngbawlna tlak a tling khawp mai a, tin Pathian thu ziak  chi hrang hrang dawr ah tlawm te te in lei tur a tam a, zaithiam ve lo leh sermon thiam ve lo te tan pawh a sem chi tal hi chu a awlsam lehzual, kan paper them pakhat a thu inziak atrang te hian beiseina neilo te beiseina kan siamsak thei a, tanpui ngai ngawih ngawih leh  nun tuihal tam tak te pawh tuihna thar kan siam sak thei reng mai.

Computer – Tunlai thalai tam tak ten  kan hman tangkai em em leh kan hman  sual mek bawk computer leh internet te hi Pathian hian rawngbawlnan a hmang duh vek a, heng kan kohhran a zaithiam tak tak te hian hla thar han sa chur chur mai se, sermon thiam te lah in han record chur chur bawk se, tin acting lam thiam tan drama tha tak tak han chang chho se, internet ah te han upload chuai chuai  mai ila thlalai hian rawng kan van bawl ve nasa dawn em. Heng internet a sermon leh zaithiam zai kan upload  te hi ram hrang hrang ah  Youtube hmang ten an lo ngaithla nasa thin hle a, USA, Canada, Australia leh hmun dang dang a awm kan mizo unaute hian  an thlarau nun chawmtu leh an thlarau nun ti chaktu ah an lo hmang  fo thin a ni.

Multimedia & Internet – Tunah chuan mihring kan changkang tawh a smartphone kan neih deuh fur tawh a, kan phone atrang engkim mai kan khawih thei tawh a ni ber mai,  heng social media hrang hrang facebook, whatsapp, we chat, skype leh thil dang tam tak te hi rawngbawl nan han hmang ve ta ila a van tha dawn em. Midangte tan a kan tha leh kan theihna kan hlan hian kan hlan te mai bakah  keimahni ah hlimna leh phurna a lo awm ve zel thin. Tin, thil pakhat ka vei thin em em chu kan unau vanduaina tawk mitdel tam tak awm te hi, kan damlaia kan tanpui thei lo a nih pawh in, kan thih hunah kan mit te hi han hlan thei ila an tan chuan a van hlu dawn em, heng social media atang te hian group member te hnen ah awareness te nei in Pathian thu tha tak tak te han  in thon kual chur chur mai ila a van tha dawn tak em. Tunah pawh hian kan ching chho zel a a tha ka ti khawp mai, mahse hei aia nasa leh tha zawk in kan la kalpui zel thei tih erawh hre theuh ang u. Amaherawhchu , eng social media a kan thil hmuh zawng zawng te hi thudik a ni em tih kan finfiah hmasak zel hi kan tih tur a ni , a bikin kan rawngbawltu sermon tha tak tak min hlui thin tute hian heng media atanga an thil hmuh leh hriat te hi a dike m tih finfiah hmasa thin phawt se sermon velah an telh dawn a nih pawn. Tin, Thalai te zing ah social media hman dan tur inhrilhhriat na hun hman te pawh hi a tha khawp mai.

Kan khawvel hun hi a hmawr chho zel a, tupawh mai hi nuamsa tak a awm mai mai ahun tawh lo, rawngbawlna tur tam tak a awm chho mek a, rawngbawl tur a chakna kan la neih lai leh huntha kan la neih lai mek hian heng Media rawngbawlna hrang hrang ah hian hmalakna tur a van tam em. Heng media peng hrang hrang hmanga kan program pakhat lek neih ringawt atrang pawh hian rawngbawlna zau tak leh hlawhtling tak kan nei thei tih hriat a tha khawp mai. Chanchintha hril hi  Pathian hian mithiamte  kutah ringawt a dah lova, kan zaivai kut ah mawhphurhna pawimawh tak a dah tih hria ila, kan talent neih theuh te hi min hmangaihtu Isua tan kan hmang ve dawn em le?